//سندريلا والامير//

[georgette]

قصة //سندريلا والامير// تحكى على طرق عديدة وانا ساحكيها لكم مثلما احكيها لاولادي
كان يا ما كان *كان في رجال غني وحالتو كتير منيحة، كان عندو بنت كتير حبابة وكتير حلوة ،بس من لمن ماتت امها وهي عم تعمل كتير بالبيت وما عم تضحك الا اذا شافت ابوها، هون فكر الاب يمكن سندريلا محتاجة لام جديدة تساعدها وتسليها،،شو عمل اتزوج من وحدة الله يستر والاحلى منو انو عندها بنتين ولك يضربو على شكلن شو بشعين وكسلانين،ولانون كتير كانو كسلانين بقي كل الشغل برقبة هالمسكينة سندريلا،، سندريلا جيبي افطور،،،سندريلا كنسي الارض،،،سندريلا طالعي مي من البير،،،وهيك يا حبيبي عاشت هالمسكينة بكسر الضهر من الصبح للمسا، وبدكون تسالون *وينو ابوها ليش ما بيحكي* بدي اقولن انو اي شايف وحاسيس بس ما فيو يفتح تمو ويحكي شي لانها مرتو كتير كتير شرسة وعصبية، اتصورو حتى انن اخدو من ساندريلا حتى اتيابها ودهبها وقنادرها وما خلولها غير فستان مقطع ومشرشح منشان الشغل.
في يوم كان لازم يروح ابوها التاجر عالسوق منشان ايشوف رزقو ويلحق على هالكوم المبيطر سالها لمرتو شو بدا يجبلها معو قالتلو*بدي اتجيب لكل وحدة مننا قماش الحرير ويكون من النوع الجيد سمعت ما؟،*البنت الكبيرة قالت*بدي اتجيبلي احلى واغلى عقد الماس سمعت؟*البنت التانية* انا بدي اتجيبلي قندرة من جلد الحية ويكون جلد سميك ومريح سمعت؟* لمن شاف سندريلا ما عم تحكي سالها* وشو بدك انت يا بنتي* قالتلو* روح يا بابا لهالشغلات الي بدك تشتري ما رح يبقالك مصريات ،انا بدي ترجعلي بخير هاد بيكفيني* ابوها انعصر قلبو من قهرو وقالها لا بدك تطلبي شي منشان هيك قالتلو* طيب يا بابا اول شي تشوفو عيونك جيبلي هو* طلب خاطر منون وراح
وسندريلا بلشت تغسل وتكنس ،تمسح وتشطف تطبخ واتضر،،في من هالايام سمعو ان ابن الملك عامل حفلة كبيرة وعازم كل بنات المملكة منشان تاينقيلو عروسة، والفرحة كانت بالمملكة يا ساتر وبالاخص ببيت مرة ابوها لسندريلا،،لمن اجا الاب على البيت ركضو اقدامو من غير ما يسالو كيفو وكيف كانت رحلتو ،هجمو على القماش والدهبات وبلشو يحضرو ويخيطو تيب مننو منشان حفلة الامير،،، سندريلا بوست ابوها وسالتو عن حالو ،قالها* يا سندريلا انت طلبت مني اخدلك اول شي تشوفو عيوني وهاد هو اول شي شفتوه، عطاه غصن ناشف وفيه تلات بندقايات نيشفين وقالها *شو فيك تكملي منن يا بنتي؟*
اجا يوم الحفلة وحضرو الكل حالون ليروحو للحفلة بس سندريلا ما الها هاج من شي مع انو كان تتمنى انو تقدر تروح، ،مرة ابوها قالتلها* سندريلا لبكرة بدي ياك اتنضفي الاسطبل واذا نسيتيه بدي عاقبك كتير* ركبو الحنطور وراحو على الحفلة، قعدت ساندريلا تبكي وتبكي فجاة سمعت صوت غذب عم بسالها* ليش عم تبكي يا ساندريلا ولشو ما رحت لحفلة الامير* برمت راسها وشافت مرا قصيرة وسمينة وبايدها عصا صغيرة ، قالتلها* لوين بدي روح مرة ابوي منعتني وما في عندي فستان البس* قالتلها الجنية الصغيرة* ابوك جابلك هدية ما بدك تفتحيها* هاي اتطلعت بالغصن الناشف واخدتو بايده وقعت وحدة منهن على الارض وشو تتصورون طلعلها من ،،فستان ولا احلى من هيك ،لبستو وهي كتير مبسوطة ،بس من غير قندرة ما فيها تروح،ومن شان هيك ضربت البندقة التانية بالارض وطلعلها منها قندرة قزيز ولا في متلها بالدنية،،لبستها وضربت التالتة كمان بالارض وطلعلها عقد واسوارة وفرحت كتير كتير بهالهداية الحلوة ،بس كيف بدها تروح للحفلة من غير حنطور، الجنية قالتلها*انا بدي اعطيك حنطور بس لا تنسي اذا دقت الساعة 12 لازم ترجعي عالبيت لانو بعدها تايخلص السحر* وعدتها وركبت بالحنطور واجت على القصر،،لمن دخلت شافها الامير ،اتعجب من جمالها وركض لعندها اخد بايدها وبلشو يرقصو مع بعضن ،والتانين يتطلعو وينحسدو ،دقت الساعة 12 وجفلت ساندريلا وكانها كانت بحلم كتير حلو،بلشت تركض لبرا بس الامير ما بدو يتركها ركض وراها وعم يسالها لوين رايحة،بس هي معجلة وخايفة ما يفوت عليها الوقت ،لا شوفو على الدرج انشلحت قندرتها اليسرى ولانو ما الها وقت انجبرت تتركها منشان تلحق حالها، الامير اخد القندرة بايدو وحلف ليدبر صاحبتها
في اليوم الي بعدو ركب على فرسو وبلش يدور البيوت ويطلب كل البنات لبرا من شان يجربو القندرة ،هاي اجرها عريض والتانية طويلة والتالتة رفيعة والرابعة قصيرة ،تقول وكانو سحر مسحور هالقندرة.
اجا لبيت التاجر وقال *كل البنات الي بهالبيت يجربو هالقندرة* اجو البنتين كمان وحدة عريضة والتانية طويلة،،الامير بلش يحتار ما عاد في بنات بكل المملكة؟؟ فجاةسمع صوت التاجر عم يقول* بلى في بنت بالاسطبل ساندريلا فيها اتجربها* مرتو غضبت كتير وبشت تصرخ فيو*شو انت انجنيت ولك ساندريلا الموسخة بدك تعطيها للامير* الامير صرخ بالمرة *ولك سكري تمك انت كيف بتحكي جوزك انقلعي وجيبيلي ساندريلا يا مرة* راحت وهي عم تنزل سم جابت ساندريلا ،لمن شافها الامير عرف بالحال انو هاي هي اميرتو،لبسها القندرة وشوفو دخلت متل القالب باجرها حملها لساندريلا وركبها على فرسو ،واتزوجها وعاشو بالقصر مع ابوها حياة سعيدة وهنية، وشو صار من مرة الاب ،اتصور لا صار لازم تطبخ وتغسل لحالها ولبناتها الكسلانين واتعلمت انو الاعتماد على التانين ابدا ما منيح،،وتوتة توتة خلصت الحدوتة
شو الي فهماه اليوم يا حلوين
1* الصبر مفتاح الفرح
2* القلب الطيب بكافئو الرب
3* الكسل ما بيضر الا صاحبو
جورجيت

[georgette]

--------------------------------------------------------------------------------
اختي ام نبيل واخي ابو نبيل* اشكركن كتير على هالتشجيع وهالكلام الحلو وكلنا ايد وحدة منشان انكمل هالحلقة الكبيرة ،الله يوفقكن وتشكرون كمان على كتاباتكن المذوقة والمفيدة
اختكن جورجيت


--------------------------------------------------------------------------------
أختي جورجيت:
كل فتاة يانعة الشباب تحلم بأنها سندريلا وسيأتي الأمير على حصانه ليطير بها إلى عالم الحب كتبتيها بأسلوب رقيق وقريب إلى القلب كرقة قلبك فظعتي يا جورجيت وفقك الرب
سميرة


--------------------------------------------------------------------------------
جميل جداً وحلو ما تكتبين يا جورجيت فهو هادف ومفيد ومسل وخاصة أنك دائماً وفي خاتمة القصة تستخلصين العبر التي يمكن استيعابها من القصة وكأنك تختصرين كامل القصة في تلك العبارات المفيدة والذكية. شكراً لك يا أختي على تعبك وجهدك.
فؤاد