الملك المغرور والثوب الجديد

[georgette]

الملك المغرور والثوب الجديد
كان يا ما كان كان في ملك مغرور بنفسو كتير ،همو الاول والاخير راحة نفسو ولبسو ومصرياتو ،،لا يهمو قومو ولا ناسو ولا خدامو ، العالم عم تموت من الجوع وهو كل يوم بتوب جديد
اخوين سمعو بهالملك وقال بدن ايلقنوه درس ما ينساه بحياتو ،، اجو لعندو وقالولو
يا ملك نحنا عندنا اغلى واحسن خيوط حرير وسمعنا انو حضرتك بتحب الغالي والجيد ومنشان هيك اجينا منشان انخيطلك اجمل توب اتشوفو العين،، هاد لمن سمع هالشي امر انو تتحضر غرفة للاخوين وينجاب كل المطلوب ،،الاخوين دخلو عل الغرفة وبلشو يتضحكو من هبل الملك ، قاعدين وعاملين وكانن عم يغزلو ويسرجو وكل ما يفوت واحد تايشوف التوب يتعجب
راح بيوم واحد من الخدم وقال للملك/يا ملك هادول اتنين كذابين عاملين عم يغزلو ،بس ما في لا خيوط ولا قماش / الملك راح لعند الاخوين وشاف الشي الي قالو الخادم مظبوط هوي ، سال الاخوين عن السبب ،بس هدول ما بدن ايكون شياطين اذا ما عرفو ايردو عليو //اي لا يا ملك ، هالق لا تقول مانك شايف هالقماش النادر من نوعو ، بس لازم تعرف هالقماش ما بيقدر ايشوفو الا الي ما بيكذب وما يغش //هاد الملك منشان مايطلع كذاب اكد على انو التوب من اجمل ما شافوه عيونو لهلق ورجع على غرفتو ،،بس منشان يرتاح بعت وزيرو منشان يتاكد بعيونو وايخبرو بالحقيقة ،،بس الوزير سمع بقصة الكذب ومنشان هيك ما بدو يعرفو الكل انو كذاب وهيك اكد للملك انو التوب ولا اروع منهيك
اجى وقت لبس التوب ولانو الملك كان كل ما يعمل توب جديد يطلع بين جماعتو وناسو منشان يتفاخر بجمالو وتيابو وهالمرة كمان اتجمعو العالم تايشوفو الملك بتوبو الجديد وما اطول عليكم اجى ملكنا المغرور وهوي متباهي بهالتوب النادر والجميل ،العالم خايفة اتقول شي الكل بلشو ايصفقو بس طفل صغير بلش يتضحك ويشير على الملك //هاهاها شوفو الملك عريان ،هاهاها ملكنا تخين وعريان// والعالم بلشت تضحك وتاشر باصبعها /هاهاها الملك عريان ، الملك عريان// الملك استحى كتير بحالو وركض على غرفتو وطلب بالحال الاخوين بس شو بدي قلكن الاخوين هربو ورجعو لمملكتن وهني لساتن يتضحكو من شكل الملك العريان واتمنو اتصيرلو عبرة ودرس
الملك فكر شوي بالقصة وعرف انو كان غلطان بحق العالم الي عم يحكم عليهم وعرف كمان انو التياب ما هني الي يعطوه القيمة والاحترام ومنشان هيك قرر انو يصير ملك مليح ورحيم ويحرص على راحة ناسو وشعبو واذا ما مات لساتو عايش وتوتة توتة خلصت الحدوتة
والي فهمناه من القصة
1* الغرور ما بيضر الا صاحبو
2* كل ظالم بيجيه اظلم
3* واحترام وتقدير الناس نستحقو بس اذا احترمنا اخوانا وعطيناهم قيمتهم الي يستحقوها
جورجيت

[georgette]

-
أختي جورجيت: إن شاء الله اتكونوا انبسطتن براس السنة ( كل عام وانتن بالف خير) قصتك جميلة جدا وهي تنطبق على هالمثل(من برا خام ومن جوا سخام) ومليح انو عرف غلطو سلامي للجميع
سميرة



--------------------------------------------------------------------------------
كعادتك يا أختي جورجيت عدت إلينا وأنت تحملين معك كل ما هو مفيد وما يبعث على التسلية ويعطي العبرة منه. شكراً لك وأرجو أن تكونوا قد أمضيتم رأس السنة مبسوطين وأن صحة الجميع بخير وأن بيت فهمي انبسطوا عندكم في ذلك البرد!!!.