تفّاحة انشّقتْ نصّينْ
نامي يا بنتي نامي
بغنّيلك من أحلامي
أحلى غنّيّه بهالكونْ
(مارتينا1) حتّى تنامي!
مِنْ لمّا كنتي زغيره
كنتي بالعقل كبيره
فرحنا شفناكي بهاللّونْ
مهضومه بكلّ الدّيره!
بنتي حبّوبة قلبي
نعمه جيتي من ربّي
يا ربّ تحفظها و تصونْ
عيونا تا تضوي دربي!
أمّورة و عم تنحبّي
و الفرحة ما بنخبّي
سبحانو خالق الفنونْ
بعيونك فرحة قلبي!
تفّاحة انشقّتْ نصّينْ
من ماما و بابا لتنينْ
تشبهنا بطبعا و عيونْ
بصلّيلك يا نور العينْ!
عم بنّاديكي (تينا)
كلمه حلوه تكفينا
حزن الفينا شو ما يكونْ
بضحكتها عم تشفينا!
1- مارتينا: هي ابنتنا الوحيدة.