قالتلي الحلوة
نادتني الحلوة يا شبّ
قِلتلها ماني فاضي
ما بدّي عشق و لا حبّ
م اللّي عم حبها راضي!
قالتلي عيوني أحلى
و خدودي متل التفّاحْ
قلتلها أهلا و سهلا
بس قلبي معها مرتاحْ!
قالتلي شفافي بتدوبْ
لو إنّك بتغازلها
ببوسة حلوة يا حبّوبْ
و الاّ خايف تعملها؟
قلتلها حسنك مغرورْ
ما ممكنْ يغفى حَدّي
مع حبّي مهنّا و مستورْ
روحي روحي ما بدّي!
قالتلي إنتَ الخسرانْ
شَعراتي ما في منها
قلتلها قلبي سكرانْ
و ما رح يستغني عنها!
قالتلي بشوفك مجنون
شو فيها أحلى منّي؟
قلتلها و جنوني جنون
يا حلوة حِلّي عنّي!
ما بدّي غيرا لو موتْ
فيها عشقي و جنوني
بقلبي مغروسة و بتفوتْ
تحميها رموش عيوني!