Forum of Fouad Zadieke - يا حلوه العم تتمخطر

يا حلوه العم تتمخطر

يا حلوه العم تتمخطرْ
دلّيني بيتك وَينو
لا طابورات العسكرْ
رَح توقفْ بيني وبينو
هالضّحكه الكلاّ سكّرْ
والخصر المايلْ لينو
منْ حِبّو قلبي يسكرْ
دوّخني يحرقْ دينو
يا حلوه ألله وأكبرْ
لا تنغرّي وتطفينو
لو مَيّتْ منّو اتعطّرْ
بلمسة إيدك تحيينو
خلّيني حَدّك إسهرْ
ورمشك يحلا تلوينو
والفرحة عندي تكبرْ
تغنيني باللّي فينو
يا إمّ الشعر الأشقرْ
دخلك دلّيني وَينو
درويشك حالو اتعتّرْ
ادعيلو تا ألله يعينو.

ألمانيا في 18/7/2005 م