Forum of Fouad Zadieke - يا طير امرق بالوادي

يا طير امرق بالوادي

يا طير امرقْ بالوادي

طمّني كيف بلادي؟

مشتاقة وقلبي موجوع

من حبّا حبّ اولادي.

حلوه جبالا وتتلالا

بتلوج تغطّي تلالا

بسهولا طاب المشوار

خبّرني كيف احوالا.

بعّدنا صارلنا زمانْ

عنّا وهيّي بالأحضانْ

عم بيعزّب فينا الشوق

ونيرانو متل البركانْ.

خبّرني عن حال الجار

وشو صار بأخبار الدار؟

ماعم تروح من البال

لا بالليل ولا بنهارْ.

ياما لعبنا بالميّاتْ

ونطنطنا حول الشّجراتْ

وياما صيّدنا السّمكاتْ

ونعسنا تحت الفيّاتْ.

وينو الحيّ ووينو البيرْ

الكنّا نشرب منّو كتيرْ

وينو عمنا (إبراهيم)

ودكّانو هاك اللّزغيرْ.

كنّا نلعب قدّامو

وكانت تسعد أيّامو

يفرح ويغنّي ويبيع

وتكبر فرحة أحلامو.

يا خسارة راحتْ الايّامْ

والغربة صارتْ قدّامْ

صعبه ومرّة ما بتنطاقْ

يا تعتيري بهاالأيّامْ.

** قصائد لمن يريد أن يغنّيها