Forum of Fouad Zadieke - أتشرّف فالأزخيني شعر: فؤاد زاديكه

أتشرّف فالأزخيني

شعر: فؤاد زاديكه

أزخيني أبًّا عنْ جِدّ

و فالأزخيني أتشرّفْ

جِدْ جِدّي مِن (كِنّك)[1] جا

لو حبّيتْ و تِتْعَرّفْ

سَسْ إخوة كانوا هَونَك

جِدّي خبّرنا و عَرّفْ

وِاحد مِنّنْ جا ل(آزخْ)[2]

و التّاني ف(اسفس)[3] وَقّفْ

و التّالت فِا(لّمدينة)[4]

تاجر فالمال اِتصرّفْ

(بِشره) و (اسطيفو) و (عِزّو)

كانوا الإخوة فالموقِفْ

بَيناتنْ كَيكو محبّة

كِلْ وِاحد مِنّنْ يِحلِف

براس الإخوة مو فِالکزب

أشقد أحكيلك أوصِفْ

مو تِتخيّلْ, كانوا بوش

يحبّوا بعضن, تِه تِعرِفْ

و بَعدا جَوا كِلّنْ لآزخ

عاشوا و ماتوا, أتأسّفْ

ما ريتو وِاحد مِنّنْ

ألله يرحم لِتْقَرْصَفْ

أولاد أولادن قاموا

ف(آزخ) مِتل الما أعرِفْ

و أحفادن مِن بعدن جَوا

من آزخ قالوا أشرَفْ

ف(عَنديوَر)[5] صاروا عسكر

فرنساوي و اصطفّوا صَفّْ

و بَعدا الفرنساوي قام

مِنْ سوريّة ما وَقّفْ

راحوا عمامي علبيرود

و جِدّي بَقْ هَونه يرجفْ

(بره بيصا) صارت قبرو

أينو قبرو مو نِعرِفْ.

[1] إحدى القرى السريانية تقع في برية نصيبين جاء منها أجدادي إلى آزخ

[2] البلدة السريانية المناضلة تقع الآن في حدود تركيا اسمها القديم بيت زبداي

[3] إحدى القرى السريانية التابعة لآزخ

[4] هي جزيرة ابن عمر أو الجزيره و إليها ينسب الجزراويون

[5] إحدى القرى التابعة لديريك كانت مركز قيادة للجيش الفرنسي