حكامنا صخره..................

[يعقوب فاضل الماهر]

دم الطفل عالمادنـــــي كبر.....صـــــــــوت الأهل مدبوح ياعسكر

وحزن اليتامى بالكنيسه جراس.....تصرخ بروما وجامع الأزهر

أطفالنا بغزه زهر حــــساس.....صابـــــيع بيضا ودفتر معتر

صارو شلايا بشرع ليفني وشاس.....غفيو سوى الصابيع والدفتر

وأم الطفل وجنون مابينقاس.....ويلا البنت ويلا صبي مكسر

تحفر مابين الردم والترباس.....تبرم على سرير الصبي الأصغر

***************
حكامنا صخره بلا احـــساس.....دخلت سبات جبينها مشحتر

باراك عاطهر الكرامـه داس.....وهني اكتفو بالشجب عالمنبر

مشعل كرامتنا تلاشى وناس.....لامعتــــــــصم عنا ولا عنتر

عنا ملوك لبوش ترفع كاس.....خمرو بدم طــــــــفالنا معكر

النفط الخليجي ساح في تكساس.....زيتو لحرق طفالنا مسوكر

وأهل الكنانه شــــيدو متراس.....وبوجه غزه سكرو المعبر

***************
هيدي مزارع مش دول تنقاس.....الشاطر بيلـــــهط حنطة العنبر

ولبسو العبايي مطرزه بالماس.....وتعطرو بالمــــــــسك والعنبر

والشعب حول المزرعه حراس.....من الجوع عضمو رق وتنخر

والكلب كلما جاع ياســـــــياس.....كلما بيــــــــلحق صاحبو أكتر

***************
وين الـــعرب وينو أبو النواس.....يهـــــجي معي تاريخنا الأغبر

هبوا بقى يامصــطفى والياس.....دم الـــــــــفدا بغزه رجع زهر

فلسطين بدها عالمـــحبه ناس.....تنــــــسى الأنا وتدوب بالأكبر

كلما بتقشـــــــعنا شعب خناس.....كلما حـــــــــلم تحريرها تبخر