كلمالا تحلى وتحلى
كلمالا تحلى و تحلى
و خدودا تورّد أحلى
قلبي عم بيحبّ الورد
و غير ورودا ما استحلى.
يا حلوة حاجة كِبرةْ
و الزّغرة هي الكبرةْ
إنتي بهالحسن و هالقدّ
فيكي مزروعة القدرةْ.
كلنا عم نتمنّاكي
و عالشارع نستنّاكي
مافي حنّيّة و لا ردّ
شو بينفع نترجّاكي.
عيونك عم تغزل أشعارْ
و العشق يخبّي الأسرارْ
مافي حاجة هجر وصدّ
حكّينا ما عدنا زغارْ.
سبحانو الكوّن هالكونْ
وحطّ البسمة شوفي شلونْ
كلياتك مغسولة بشهدْ
بأحلى شكل وأبهى لونْ.
يا نيّالو يا دلّو
ياللي قلبك يوصلّو
عم حكّيكي جدّ الجدّ
نصّو بدنا مو كلّوْ.
تكفينا يا بنت النّاسْ
غمزة عين و شربة كاسْ
عم نستنّى منك ردّ
يمكنْ يتعبّا هالرّاسْ!