لا حانة شايف تنفعْ
لا حانة شايف تنفعْ
و لا مانة تقدر تجمعْ.
كِلْ مِنْ غنّى موّالو
مع غيرو أو معْ حالو.
حال معتّر عالدّايرْ
شوفي بغزّة شو صايرْ
يا ما قالوا ما في ضربْ
صاير قصف وقتل و حربْ.
هادا بيزعل منْ هادا
يحقدْ يكره بزيادة.
و لو تقعدْ معهم تسمعْ
حكياتن عقلك يطلعْ.
بيقولو الدّم محرّمْ
بين الإخوة و مجرّمْ
شايف كيف الدّم يسيلْ
و غزة عم تقتلْ تقتيلْ
(فتحْ) بتنسف ما بيهمّ
و(حمّوسة) تشربْ من دمّ
هيك الإخوة يا عالم
تتزابح ما تتسالم؟
خلّو إسرائيلْ تعيشْ
و تعطيكن منها البخشيشْ
حتّى تزيدوا م الأحقادْ
و تيتموا منكن أولادْ
و ترملوا منكن نسوانْ
و اتدمروا كلّ البنيانْ
يالا فرجونا لنشوفْ
شو في مخبّا مو مكشوفْ
صرتن للعالم فرجة
و حالتك صارتْ عَرجة
عيب اتبطلوا ضربْ السّيفْ
و يبقى بزمّتكن شي حَيفْ
خربوا بيوت و هدّوا دورْ
متل البدّو هالمأمورْ
أوعى تبطلوا هادا عيبْ
و الاّ حطيتوا بالجيبْ؟
والله لو ضلّتْ هالحالْ
متل الل هيّة ما تنزالْ
راح تصيروا نصّ قرودْ
و مدفعكن يبقى المعبودْ!