Forum of Fouad Zadieke - عِلْكِتْ الكوچَرْ بقلم: فؤاد زاديكى مْبِيرْحَا (البارحة) جَا (جاء. اتى لطرفي) عِندِي

عِلْكِتْ الكوچَرْ

بقلم: فؤاد زاديكى

مْبِيرْحَا (البارحة) جَا (جاء. اتى لطرفي) عِندِي سَديق (صدیق) و قاللي: تْرِيدْ عِلْكِتْ كو چَر (علكة تصنع كسائل من نبات معيّن يوضع فوق الصخر، ألى أن ينشف تمامًا و ياخذ شكله الاخير هذا. اشتهر بصنعها أكراد عشيرة الكوچر في منطقة الزّوزان بتركيا)؟
قِلتّولو: پَحَّكْ (عبارة استغراب و تعجّب و استكثار). مِنْ أينْ حِصِلتْ عَلَيَا؟
قال: قبلْ يومينْ كِنْتُو فِموظَعْ (في موضع أو مكان)، أرَيتُو كَيْبِيعُونْ هَونَكْ(هناك) بوشْ (كثير) شِيّات (أشياء)، و مِنْ بَيْنِاتِنْ (و من ضمنهم) عِلْكِتْ كوچَرْ، قٍمتُو اشْتَرَيْتُوَا.
قِلتُولُو: اِيْ يَقِّنْ عِلْكِتْ الكوچَرْ طَيبِهْ يِهْ. لِهْ بَسْ لوزاتْ الوِاحِدْ يِقَعُون إيلَا ما يْحِلَّا (إلى أن تُصبح جاهزةً للمضغ).
سألني قالْ: ضْراصِكْ أشطوفِنْ؟ (ما هو حال أسنانك؟)
جاوَبتُوو قِلْتُولُو: نِشكِرْ أللهْ. ضِرَاصِي بوشْ كْوَاسِنْ (هم بحالة جيدة). إيلَا هَلَّا (لغاية الآن) كِنْ صَاغْ. سَلِيمْ. ما قَلعتُو وَلَا ضَرصْ. كِلِّتِنْ أصليِّهْ نِنْ (اوريجينال). حَصَايِهْ فِعَينْ الشّيطانْ و الحاسِدْ.
مو طَوِّلْ عَلَيكِنْ فِالحَكِي. أرَيتُو طِالَعْ (أخرجَ) مِنْ جَيبُو مَرْحَمِهْ (محرمة)، كِنْ لَفّْ جَوَاتَا (بداخلها) سَسْ (ثلاث) شِقَفْ عِلْكِهْ. عَطانِي نِنْ. قالْ: خِزِلِكِنْ. جِبْتُوِنْ شَانِكْ (لأجلك)
قِلتُولُو: أشقَدْ يِسِيرْ حَقِّنْ (ثمنهم)، شَأعطِيكْ؟
قال: عيبْ عَلَيكْ. قَي أنا جِبْتُولِكِنْ شَآخِزْ حَقِّنْ مِنِّكْ؟ (و كَمَّلْ قال): تِهْ يكُونُونْ هَدِيِّهْ مِنِّي. چاخِلْ (عندما) أرَيتُو عِلْكِتْ الكوچَرْ تْزَكَّرْتُو (تذكرتُ) أيّامْ زَمَان فِدِيرِكْ (في مدينة ديريك المالكية)، كا نِشْتِرِيَا (كنّا نشتريها) مِنْ دِيرِكِتْ العتيقَةْ (القسم القديم من مدينة ديرك في محافظة الحسكة بسورية). الكوچَرْ كَيجِيبُوَا و يبيعُوَا. هِنْگِهْ (في ذلك الوقت) كِنّا زْغارْ (صغار). لوزاتْنَا كَيقَعُونْ و لاماتْنَا (خدودنا) كِيُورَمُون. كا (كُنّا) نِهْلَكْ إيلَا (لغاية) ما نْحِلَّا. و بَسْ كَا تِنْحَلّْ و تْلِينْ. أطْيَبْ مِنَّا و مِنْ مَزَغَانَا (مضغها) ما كَيْكُو (لا و لن يوجد).
قِلتُولو: أي سَدِّقْ (صَدِّقْ) و آمِنْ. قِلتْ الحقّ.
شَكَرتُووو بوشْ و قلتُو فِقَلبِي. سَدِيقِي (صديقي) صارلُو (أصبح له) دَينْ فِرَقبِتِي، و لازِمْ أوَفِّيُو. أرِدْلُو دَينُو.
المانيا في ٢٦ أيار ٢٤