|
هَجَرْتو بيتْ أبوي شعر/ فؤاد زاديكه
هَجَرْتو بيتْ أبوي شعر/ فؤاد زاديكه هِجْرِتي دار بيتْ أبوي ... و الدّمعة فِعيونِي إمّي الحنونِه و أخوي ... خَوفي لا يِنْسَوني. *** عِنْدكي كِنتو مدَلّلِه ... و ما كِنتو مَمنونِه صِرْتو جِبْنِه مشَلَّلِه ... حَسَّيتو فِجنُوني. *** قُربانو روحكي أصيرْ ... إيدَيكي رَبَّوني أيمَتْ لَعِنْدكِي تَطيرْ ... كِن طَلَعوا قرونِي. *** على جَناحِ لطيورْ ... للنّيس الحبّونِي الغِرْبِه مَرارِتْ قبورْ ... وِ ضْرَاسا مَسنونِه. *** لَيلْ الغِربِه آخْ و أوخْ ... دَبّلِتْ جفونِي صِرنا فِيَا كَما فروخْ ... و الحالِه مَحْزونِه. *** وِصِلتو باب بيت أبوي ... إخواتي شافُونِي كِنْ خَبَّروا بيتْ حَموي ... بارَكوا و هَنّونِي. |
| الساعة الآن 05:46 AM. |
Powered by vBulletin Version 3.8.6
Copyright ©2000 - 2024, Jelsoft Enterprises Ltd
Translation by
Support-ar
Copyright by Fouad Zadieke