عيونك
عيونِك غِنيّة هالكون
ما عُمرُن غنّوا مِتلا
أحلى عزف و أحلى لون
و لو بِتحبّي بصَوّتلا.
يلا تا ندبك دبكه
و عيونك منها الألحان
إيدي بإيدك مِشتبكه
أغصان توشوش أغصان.
عيونك يا أمّ العيون
سحر الفيها مجنّني
و لو ما كانت كيف بكون
دَخلك لا تغيبي عنّي.
غنّوها قبلي الشعّار
و ما حبّتْ نغمة غيري
عيونك ميزان الأشعار
غيري يا عيونا غيري.
عيونك بحر و غوّاصين
و جفونك شطّ الحلوين
عشتي بعمري حب سنين
و ضلّوا عينيك المضوين.
